IETS VIR DIE GEMEENSKAP

Ons ouditkantoor is opgeknap en gevolglik het ons ‘n paar items gehad wat inhuis nie meer benut kon word nie.  Ons het ‘n lugversorger aan Mev Venter van Parow geskenk, asook van die meubels aan Wamakersvallei Opleidingsentrum.

Die brandbestryders was tot onlangs nog baie aktief in die Boland en as blykie van ons waardering en ondersteuning het die personeel ‘n paar items aangekoop en na afsetpunte geneem.  Baie dankie ook aan die personeel wat studente, wat by Bainskloof kampterrein ‘n Eerstejaarskamp bygewoon het, met hulle voertuie gaan haal het toe die brande die kampterrein bedreig het.  Dit is ‘n voorreg om te beleef hoe ‘n gemeenskap in tye van nood kan saamwerk.  Dankie vir elkeen se hulp.

Groot geskenke of bydraes is dus nie altyd nodig om vir iemand tot seën te wees nie.  Solank ons bereid is om behoeftes raak te sien en daarop te reageer, maak ons ‘n verskil in mense se lewens en in ons groter gemeenskap.