PERSONEELNUUS

Op 12 Mei het ons kantoor ‘n spanbou sessie gehad.  Die temas wat bespreek was, was Persoonlike produktiwiteit en Konflikhantering.  Dankie aan Margaux Reitsma van Uluma HR wat haar insigte met ons kom deel het.  Ons vind dit altyd baie insiggewend!

13 Mei het ‘n paar van ons kollegas aan die Gravel Travel MTB by Doolhof Wynlandgoed net buite Wellington deelgeneem.  Die BGR fietsryhemde het verseker daardie ekstra bietjie selfvertroue en deursettingsvermoë bygedra sodat die manne die rowwe 50km suksesvol kon voltooi.  Op die foto van links na regs is Jacobus Maree (Direkteur), Jacques Aldrich (vorige werknemer), Hendrik Rabie (Rekeningkundige Bestuurder) en Chris Fick (vriend).

21 Mei het ‘n paar van ons vroulike kollegas aan FNB Cape Town Onerun deelgeneem.  Johannie Truter, Anél Rabie en Yolandé Maree (foto van links na regs) en Lizette Vorster het die 12 kilometer suksesvol afgelê.

26 Mei was Tekkie Tax waar ons tekkies gedra het en in die proses ‘n bydrae tot mense met gestremdhede gemaak het.

Veels geluk aan Amanda Swarts (Belastingbeampte) met die geboorte van haar dogter se seuntjie op 30 Mei 2017.  Ons is saam met Deon en Amanda opgewonde oor klein Thomas (3.3kg en 51cm).  Ons beste en mooiste wense vergesel die trotse ouers, De Vos en Michelle.

Veels geluk aan Petri Westraadt met die verwerwing van sy Meestersgraad in Belasting.  Petri is sedert Oktober 2012 in ons Belastingafdeling werksaam en met die ondersteuning van sy spanlede, doen hul uitmuntende werk t.o.v. geïntegreerde dispuut resolusie sake die laaste paar jaar.  Ons is baie trots op Petri en hierdie afdeling.

Ons is tans besig met ‘n Fondsinsameling vir SA Voedingsprojek.  Hulle voed daagliks meer as 1 900 kinders.  Hulle het onlangs begin om uit te reik na informele nedersettings waar hulle toesien dat meer as honderd mense iets kry om te eet, drink, asook klerasie.  Ons personeel maak dus ‘n bydrae ten opsigte van blikkies kos en onbederfbare produkte, asook klerasie en komberse.  Ons beplan om die week van 5 Junie die oorhandiging te doen.

Maritsa Volschenk (Ouditklerk) het weer deelgeneem aan die Comrades op 4 Junie 2017.  Verlede jaar was haar eerste Comrades.  Hierdie jaar het die atlete vanaf Durban na Pietermaritzburg gehardloop.  Aangesien sy “back to back” gehardloop het, het sy by die eindstreep ook ‘n spesiale medalje daarvoor ontvang.  Dit word oorhandig aan atlete wat hul eerste “down run” en “up run” na mekaar voltooi.  Veels geluk Maritsa!