2024 JAAR VAN AANSLAG: WIE MOET INKOMSTEBELASTING OPGAWES INDIEN, WIE IS VRYGESTEL EN WAT IS DIE SPERDATUMS?

In terme van die regulasies wat op 31 Mei 2024 deur die Kommissaris van Suid-Afrikaanse Inkomstediens bekragtig is (saamgelees met die regstellende kennisgewing van 6 Junie 2024), moet sekere persone inkomstebelastingopgawes indien vir die 2024 jaar van aanslag, terwyl sekere persone vrygestel is.

Die persone wat moet indien, sowel as persone wat vrygestel is word hieronder bespreek, sowel as die indiening sperdatums vir die verskillende kategorieë persone wat wel moet indien.

1. Die volgende persone moet ’n inkomstebelastingopgawe indien:
   1. Elke maatskappy of ander regspersoon, wat ’n inwoner was gedurende die 2024 jaar van aanslag wat—
      (i) bruto inkomste van meer as R1 000 verkry het;
      (ii) bates met ’n koste van meer as R1 000 gehou het of laste van meer as R1 000 op enige tydstip gehad het;
      (iii) enige kapitaalwins of kapitaalverlies van meer as R1 000 verkry het vanuit die beskikking oor ’n bate waarop die Agtste Bylae by die Inkomstebelastingwet van toepassing is; of
      (iv) belasbare inkomste, belasbare omset, ’n aangeslane verlies of ’n aangeslane kapitaalverlies gehad het;
   2. Elke trust wat ’n inwoner gedurende die 2024 jaar van aanslag was;
   3. Elke maatskappy, trust of ander regspersoon, wat nie ’n inwoner gedurende die 2024 jaar van aanslag was nie, wat—
      (i) ’n bedryf deur ’n permanente saak in die Republiek beoefen het;
      (ii) inkomste vanuit ’n bron in die Republiek verkry het; of
      (iii) ’n kapitaalwins of kapitaalverlies verkry het vanuit die beskikking oor ’n bate waarop die Agtste Bylae by die Inkomstebelastingwet van toepassing is;
   4. Elke maatskappy ingelyf, opgerig of ingestel in die Republiek, maar wat weens die toepassing van enige ooreenkoms aangegaan met die Regering van enige ander land vir die vermyding van dubbele belasting nie ’n inwoner gedurende die 2024 jaar van aanslag was nie;
   5. Elke natuurlike persoon wat gedurende die 2024 jaar van aanslag—
      (i) ’n inwoner was en enige bedryf beoefen het (behalwe uitsluitlik in sy of haar hoedanigheid as ’n werknemer); of
      (ii) nie ’n inwoner was nie en enige bedryf binne die Republiek beoefen het (behalwe uitsluitlik in sy of haar hoedanigheid as ’n werknemer);
   6. Elke natuurlike persoon wie gedurende die 2024 jaar van aanslag—
      (i) ’n inwoner was en kapitaalwinste of kapitaalverliese wat R40 000 oorskry, gehad het;
      (ii) nie ’n inwoner was nie en kapitaalwinste of kapitaalverliese verkry het vanuit die beskikking oor ’n bate waarop die Agtste Bylae by die Inkomstebelastingwet van toepassing is;
      (iii) ’n inwoner was en enige fondse in buitelandse geldeenheid gehou het of enige bates buite die Republiek besit het, indien die totale waarde van daardie fondse en bates op enige tydstip gedurende die 2024 jaar van aanslag, R250 000 oorskry het;
      (iv) ’n inwoner was en aan wie enige inkomste of kapitaalwinste uit fondse in buitelandse geldeenheid of bates buite die Republiek ingevolge die Inkomstebelastingwet toegereken kon word;
      (v) ’n inwoner was en enige deelnemende regte, soos in artikel 72A van die Inkomstebelastingwet bedoel, in ’n beheerde buitelandse maatskappy gehou het;
      (vi) ’n inwoner was en belasbare omset gehad het; of
      (vii) behoudens die bepalings van afdeling 2 hieronder, aan die einde van die 2024 jaar van aanslag—
      (aa) jonger as 65 jaar was en wie se bruto inkomste R95 750 oorskry het;
      (bb) 65 jaar of ouer was (maar jonger as 75) en wie se bruto inkomste R148 217
      oorskry het; of
      (cc) 75 jaar of ouer was en wie se bruto inkomste R165 689 oorskry het;
   7. Behoudens afdeling 2 hieronder, elke boedel van ’n bestorwe persoon wat bruto inkomste gedurende die 2024 jaar van aanslag gehad het;
   8. Elke nie-inwoner wie se bruto inkomste gedurende die 2024 jaar van aanslag, rente vanuit ’n bron in die Republiek ingesluit het waarop die bepalings van artikel 10(1)(h) van die Inkomstebelastingwet nie van toepassing is nie;
   9. Enige persoon aan wie ’n inkomstebelastingopgawe vorm uitgereik word of wat skriftelik deur die Kommissaris versoek word om ’n opgawe in te dien, ongeag die bedrag van inkomste of die aard van die ontvangste of toevallings van daardie persoon; en
   10. Elke verteenwoordigende belastingpligtige van enige persoon in subparagrawe (a) tot (i) hierbo bedoel.
2. Die volgende persone word nie vereis om ’n inkomstebelastingopgawe in te dien nie:
   1. ’n Natuurlike persoon of boedel van ’n bestorwe persoon word nie vereis om ’n Inkomste-belastingopgawe in te dien nie ingevolge afdeling 1 (f)(vii) of (g) hierbo, indien die bruto inkomste van daardie persoon gedurende die 2024 jaar van aanslag, uitsluitlik bestaan het uit bruto inkomste in een of meer van die volgende subparagrawe beskryf:
      1. Besoldiging betaal of betaalbaar uit ’n enkele bron, wat nie R500 000 oorskry nie en werknemersbelasting ingevolge die aftrekkingstabelle deur die Kommissaris voorgeskryf, afgetrek of teruggehou is;
      2. Rente (anders as rente van ’n belastingvrye belegging) uit ’n bron binne die
         Republiek wat nie meer is nie as—
         (i) R23 800 in die geval van ’n natuurlike persoon jonger as 65 jaar op die einde
         van die 2024 jaar van aanslag;
         (ii) R34 500 in die geval van ’n natuurlike persoon van 65 jaar of ouer aan die
         einde van die jaar van aanslag; of
         (iii) R23 800 in die geval van die boedel van ’n bestorwe persoon;
      3. Dividende en die natuurlike persoon was ’n nie-inwoner gedurende die hele 2024 jaar van aanslag; en
      4. Bedrae uit ’n belastingvrye belegging ontvang of toegeval;
      5. ’n Enkelbedrag van ’n pensioenfonds, voorsorgfonds, pensioenbewaringsfonds, voorsorgbewaringsfonds of uittree-annuïteitsfonds ontvang, en belasting is ingevolge ’n aanwysing uitgereik deur die Kommissaris afgetrek of teruggehou.
   2. Subparagraaf (1) hierbo (die vorige punt) is nie van toepassing op ’n natuurlike persoon—
      1. aan wie ’n toelae of voorskot betaal of toegestaan is soos in artikel 8(1)(a)(i) van die Inkomstebelastingwet beskryf behalwe ’n bedrag vergoed of voorgeskiet soos in artikel 8(1)(a)(ii) beskryf of ’n toelae of voorskot in artikel 8(1)(b)(iii) na verwys wat nie die bedrag oorskry nie wat bepaal word deur die skaal per kilometer vir die vereenvoudigde metode in die kennisgewing wat die skaal per kilometer ingevolge artikel 8(1)(b)(ii) en (iii) vasstel, toe te pas op die werklike afstand afgelê; of
      2. aan wie ’n belasbare voordeel beskryf in paragraaf 7 van die Sewende Bylae by die Inkomstebelastingwet toegestaan is; of
      3. ’n bedrag ontvang het of aan wie enige bedrag toegeval het ten opsigte van dienste buite die Republiek gelewer.
   3. ’n Natuurlike persoon word nie vereis om ’n inkomstebelastingopgawe in te dien nie, ingevolge afdeling 1(f)(vii) hierbo, indien—
      1. die persoon skriftelik deur die Kommissaris verwittig is dat hy of sy vir outomatiese aanslag in aanmerking kom; en
      2. die persoon se bruto inkomste, vrystellings, aftrekkings en kortings vertoon in die rekords van die Kommissaris volledig en korrek is op die datum van die aanslag gebaseer op ’n beraming om aan die outomatiese aanslag effek te gee.
3. Tydperke waarbinne inkomstebelastingopgawes ingedien moet word vir die 2024 jaar van aanslag is as volg:
   1. In die geval van enige maatskappy, openbare weldaadsorganisasie deur die Kommissaris ingevolge artikel 30(3) van die Inkomstebelastingwet goedgekeur is, en ontspanningsklub deur die Kommissaris ingevolge artikel 30A(2) van die Wet goedgekeur, binne 12 maande vanaf die datum waarop sy finansiële jaar eindig; of
   2. In die geval van alle ander persone (waarby natuurlike persone, trusts en ander regspersone, soos instellings, rade of liggame ingesluit word)—
      (i) voor of op 21 Oktober 2024;
      (ii) voor of op 20 Januarie 2025 indien die opgawe met ’n voorlopige belastingpligtige of trust verband hou; of
      (iii) waar rekenings kragtens artikel 66(13A) van die Inkomstebelastingwet deur die Kommissaris aanvaar word ten opsigte van die geheel of ’n gedeelte van ’n belastingpligtige se inkomste, wat opgemaak is tot ’n datum na 29 Februarie 2024, maar voor of op 30 September 2024, binne 6 maande vanaf die datum tot wanneer daardie rekenings opgemaak is.

Indien daar enige navrae is, kontak gerus vir Petri Westraadt by pwestraadt@fhbc.co.za

Source Reference:

1. Kennisgewing 4918 (in Staatskoerant No. 50741)
2. Kennisgewing 4948 (in Staatskoerant No. 50770)